قصيدة زجلية مهداة إلى الشاعر محمد العيوني

العشيرة

(إلى الشاعر محمد العيوني)

يا لعْشِيرَة،

هَاكِ المُتْشِيرَة

زنْدِي العْوَافِي

الى بَالكْ هَادْ العَشْق قْلِيل

ما هُو كَافِي

يا لعْشِيرَة ،

شْرُوطْك عْليَّ كْتِيرَة

حَنِّي عْلَى هَادْ العَاشَق

كْذَبْ ف كُلْشِي

غِيرْ هْوَاك

كَانْ فِيهْ صَادَق

على الكِيسَان قَرْقَبْ لمْعَالَق

بْدَاتْ الغُنَّايَة

طِيفَكْ نَازْل حْدَاي

ورِيقْك عْمَارْت السقَّايَة

رُوحِي تَحْت السقَّايَة

نْحَطْهَا بعْنَايَة

ونْعَايْن النُقْطَة

نْعَايْن السَقْطَة

للِّي تَرْوِي عطش هْوَاي

وتْكُبْ فِيَ الآيَة

يا لعْشِيرَة ،

 لجْنَاح كْسِيرَة

الطِّير مَايْغَرّد الى مَا طَار

والطِّير بلا تَغْرَادُه

ك لعْوَر بلا كْوَادُه

… يا لعْشِيرَة،

لْيُوم مَاجِيكْ بتَبْشِيرَة

مَاهِي صْغِيرَة

مَاهِي كْبِيرَة

زَهْقَتْ من القَد والعَد

من بِينْ المَحْنَة والسَعْد

جَات تْتْنَهَّد

يا لعْشِيرَة،

هَادْ لخُبِّيرَة

بَنْتِ،انْتِ...

كُنْتِ دِيمَا حَاضْرَة

ف عْرَا لبْيَاض

طْلَعْتِ بالبحَرْ هَاضْرَة

يتمنى القلب يشوفك ليه ناظرة

يتفاجا خباله

يتسكد حاله

يا لعْشِيرَة،

عششت ف احلامي

وانت صغيرة

واليوم ما بقات بحيرة

تقادا انشادي

نمشي غريب ف بلادي

بقيتلي غير انت وعليك انادي

اناديك تلاقيني

تحيي لحساس لقديمة

يهيج تغرادي

نهدي لك زهادي

يا لعْشِيرَة،

بعشق ملسوع

حنانك راكب عناده

ما بغا يطوع

وأنا لي قضيت ايامي كاملة جوع

شحال…

شحال قد العين من الدموع

مادام مشيك ما باين له رجوع

يا لعْشِيرَة،

ها انا قدامك شفاية

انت ضدي جيتي

ما معاي

انت لكمرة للي غضرت بسماي

هجرتها...

ما بقات لها ضواية

نورالدين الغفياني

التسميات:

فيسبوك تويتر جوجل + لينكدن واتساب

إدارة موقع المنتدى